បាត់ដំបង៖ អាជ្ញាធរនៃរដ្ឋបាលខេត្ត និងក្រុង រួមជាមួយក្រុមគ្រូពេទ្យនៃមន្ទីរសុខាភិបាលខេត្តបាត់ដំបង បានចុះយុទ្ធនាការអប់រំសុខភាព រួមគ្នាទប់ស្កាត់ការចម្លងវីរុសកូវីដ-១៩ នៅថ្ងៃទី២២ ខែមីនា ឆ្នាំ២០២២នេះ។

អភិបាលក្រុងបាត់ដំបង លោក ផេង សិទ្ធី មានប្រសាសន៍ថា យុទ្ធនាការនាពេលនេះធ្វើឡើងនៅទូទាំងក្រុង និងតាមបណ្តាស្រុកមួយចំនួនក្នុងខេត្តបាត់ដំបង គោលបំណងដើម្បីក្រើនរំលឹក ពញ្ញាក់ស្មារតី និងបង្កើនជំរុញការចូលរួមរបស់បុគ្គល គ្រួសារ និងសហគមន៍ ព្រមទាំងបងប្អូនប្រជាពលរដ្ឋ ស្ថាប័ន-ក្រសួងពាក់ព័ន្ធ អង្គភាពសាធារណៈដទៃទៀត ពួតដៃគ្នាបន្តអនុវត្តវិធានការចាំបាច់នានា ដែលបានដាក់ចេញដោយការសម្រេចរបស់សម្តេចតេជោ ហ៊ុន សែន នៅថ្ងៃទី១៧ ខែកុម្ភៈ ឆ្នាំ២០២២។

ជាមួយគ្នានេះ លោកក៏បានក្រើនរំលឹកដល់បងប្អូនប្រជាពលរដ្ឋត្រូវកុំភ្លេចនូវវិធានការ ៣កុំ ៣ការពារ ដោយត្រូវចូលរួមពាក់ម៉ាស់អោយបានជាប់ជាប្រចាំ និងមិនត្រូវជួបជុំគ្នាច្រើន មិនត្រូវនៅកន្លែងបិទជិតដែលមិនមានខ្យល់អាកាសចេញចូល។

លោកកត់សម្គាល់ឃើញថាមានប្រជាពលរដ្ឋមួយចំនួនហាក់ធ្វេសប្រហែស ភ្លេចខ្លួនក្នុងការអនុវត្តវិធានការសុខាភិបាលត្រឹមត្រូវ និងហ្មត់ចត់ ដែលជាឱកាសដ៏ល្អសម្រាប់វីរុសកូវីដ-១៩ធ្វើចរាចរយ៉ាងសកម្មបង្កឱ្យមានការចម្លងជំងឺកូវីដ-១៩ នៅក្នុងសហគមន៍ជាក់ស្ដែងចាប់តាំងពី អូមីក្រុង ចូលមកប្រទេសកម្ពុជាយើងតាំងពីពាក់កណ្តាលខែធ្នូ ឆ្នាំ២០២១ មកដល់ថ្ងៃទី២១ ខែមីនា ឆ្នាំ២០២២នេះ។

ករណីឈឺ និងស្លាប់ នៅតែរកឃើញមានជាបន្ត បន្ទាប់រៀងរាល់ថ្ងៃ ដែលធ្វើឱ្យមានកំណើនសរុបនៃករណីឈឺ និងស្លាប់នៅកម្ពុជា ហើយហានិភ័យនៃការកើនឡើងនៃករណីជំងឺកូវីដ-១៩ ដោយសាតែវីរុសកូវីដ-១៩ ប្រភេទ «អូមីក្រុង» គឺប្រហែលជាមានខ្ពស់ នៅក្នុងចំណោមសហគមន៍ ដោយសារពួកគាត់បានធ្វើតេស្តរហ័ស និងស្នាក់នៅព្យាបាលនៅតាមផ្ទះដោយខ្លួនឯង៕